Myndbandið sem vísað er í

Út er komið glænýtt myndband frá góðkunningja okkar Greenman3610, en í þessu myndbandi sýnir hann hvernig beinar mælingar og athugandir styðja við gróðurhúsakenninguna og hlýnun jarðar af mannavöldum. Þetta er myndband sem mikið er vísað í og ef þú vilt eitt myndband sem sýnir svart á hvítu að gróðurhúsaáhrifin eru ekki mýta - heldur eitthvað sem að virkilega hefur verið staðfest með beinum mælingum - þá er þetta myndbandið.

Á loftslag.is er myndbandið birt ásamt lýsingu á því - og heimildum þeim sem að liggja á bak við gerð þess.

• Hvað er vitað um loftslagsbreytingar? Myndband með góðkunningja okkar Greenman3610 – hér sýnir hann hvernig beinar mælingar og athuganir styðja við gróðurhúsakenninguna og hlýnun jarðar af mannavöldum.

Athugasemdir

[Ágúst H Bjarnason, 2.3.2010 kl. 11:22]

Sælir félagar.

Getið þið hjálpað mér?

Gætuð þið sagt mér hver góðkunningi ykkar er, þ.e. menntun, hvar hann starfar, í hvaða landi, o.s.frv.   Er Greenman3610 virtur vísindamaður í loftslagsfræðum eða öðrum fræðum?  Karl eða kona?

Ég spyr vegna þess að mér tókst ekki að finna nein deili á honum eða henni með hjálp Google. Ég fæ bara tilvísun á Peter Sinclair grafískan hönnuð. 

[Sveinn Atli Gunnarsson, 2.3.2010 kl. 12:14]

Peter Sinclair er Greenman3610 og hann er grafískur hönnuður. Hann vitnar í heimildir í myndböndum eins og vera ber og segir frá því sem vísindin hafa um málið að segja. Stundum hefur hann tekið fyrir það sem efasemdarmenn hafa haldið fram og borið það saman við það sem vísindin almennt hafa um málið að segja. Hann er alls ekki að reyna að koma fram sem vísindamaður, enda myndi hann taka það fram ef svo væri.

Verði þér að góðu Ágúst.

[Emil Hannes Valgeirsson, 2.3.2010 kl. 12:46]

Það er ekkert að marka þessa grafíska hönnuði! Eintómur útsmoginn og lævís áróður sem frá þeim kemur. 

[Ágúst H Bjarnason, 2.3.2010 kl. 15:04]

Einmitt Emil

Annars get ég ekki leynt því að ég öfunda grafíska hönnuði af leikni þeirra með Photoshop og annan hugbúnað sem ég kann ekki einusinni að nefna. Þó á ég nokkrar bækur, meðal annars eina magnaða sem heitir  How to Cheat in Photoshop.

Eftir að ég eignaðist þessa mögnuðu bók hef ég ekki trúað neinu sem kemur frá grafískum hönnuðum, en er að reyna að ná tökum á brellunum svo ég geti svarað fyrir mig

[Sveinn Atli Gunnarsson, 2.3.2010 kl. 20:54]

Ágúst; ég er alveg viss um að grafískir hönnuðir eru leiknir með verkfærin sín. Mér finnst það þó töluverð alhæfing að trúa engu sem kemur frá heilli starfsstétt...þó svo broskarl sé settur fyrir aftan (öllu gamni fylgir einhver alvara eða hvað). Gangi þér vel með brellubækurnar.

PS. Við vorum að birta færslu á Loftslag.is, sem gæti verið athyglisverð fyrir þig, sjá hér.

[Emil Hannes Valgeirsson, 2.3.2010 kl. 23:18]

Ætli við séum ekki allir hér að reyna að miðla því sem við erum ekki sérfræðingar í, en þykjumst eða höfum vonandi eitthvert vit á. En hvort sem við erum grafískir hönnuðir eða eitthvað annað þá höfum við þó vísindin okkur til stuðnings - eða svo langt sem þau ná. Það er nefnilega alltaf ýmsu ósvarað í visindunum og ekki eru vísindamenn alltaf alveg sammála og það gefur okkur svigrúm til skoðanaskipta.

Smá óvísindalegu gamni verður bara að taka sem slíku þó að því fylgi kannski einhver alvara.