Hvað er rangt við þetta graf?

Tags: Afneitun, Gögn, Heit málefni, Hitastig

Við fréttum af þessu grafi hér undir sem kemur úr þessu PDF-skjali og er afurð m.a. tveggja vel þekktra efasemdarmanna um hlýnun jarðar af völdum aukningar gróðurhúsalofttegunda af mannavöldum, þeim Willie Soon (sem er stjarneðlisfræðingur) og Lord Monkton (sem er ekki Lord), sjá heimasíðu SPPI. Í lok skjalsins segir meðal annars í aðdraganda þess að grafið er sett fram:

Clearly, it is now time for us all to use the grey matter between our ears and to think for ourselves!

Ætli það sé ekki ráð að nota gráu sellurnar og grannskoða þetta graf. Gröf þessu líkt hafa einmitt sést á ýmsum blogg og heimasíðum og eiga að gefa til kynna vöntun í fylgni hitastigs og aukins styrks CO2. En hvað er rangt við þetta graf?

Það vill svo vel til að Michael Tobis hefur gert greiningu á svipuðu grafi og fundið þrjár blekkingar í því sem mætti kalla tæknileg atriði gagnanna og meðhöndlun þeirra í grafinu.

1. Sitthvor aðferðin við vinnslu gagnanna er notuð. Hitastigið er sett fram sem mánaðar meðaltal, en styrkur CO2 virðist vera án árstíðabundina sveiflna. Þetta gerir það að verkum að á meðan styrkur CO2 eykst jafnt og þétt, þá lítur út fyrir miklar sveiflur í hitastiginu, sem ekki eru í takti hvort við annað.
2. Val á skölum á lóðrétta ásunum ýkir áhrifamikið breytinguna í styrk CO2. Á síðustu hundrað árum hefur styrkur CO2 hækkað um u.þ.b. 100 ppm, en hitastig um 0,8°C. En á grafinu eru 0,8°C settar á lóðrétta ásinn á móti aðeins 35 ppm á CO2 skalanum, sem þýðir að styrkur CO2 er ýktur sem nemur þreföldun á móti hitastigskvarðanum.
3. Mjög stuttur tímarammi fjarlægir 90% af mælingum og skilur okkur eftir með allt of lítið af hitastigsgögnum til að ákvarða marktæka leitni. Loftslag er oft skilgreint sem 30 ára tölfræði veðurlags, þannig að ekki ætti að setja fram leitni með notkun á gögnum sem ná aðeins yfir 15 ár.

Michael Tobis hefur gert endurbætt graf, sem ekki inniheldur þessar villur.

40 ár af gögnum ætti að duga til að ná fram marktækum samanburði á gögnunum. Lóðrétti skalinn er þarna samanburðarhæfur fyrir bæði gagnasettin og þetta eru hvorutveggja gögn sem eru unnin út frá mánuðum, með þeim sveiflum sem því tilheyra á báðum tilfellum.

Efra grafið er enn eitt dæmið um þær blekkingar sem stundum sjást úr röðum þeirra sem telja ekki að vísindin geti veitt svör við spurningum varðandi hlýnun jarðar við aukningu gróðurhúsalofttegunda.

Heimildir:

• And What’s Wrong with This Picture?
• Whats wrong with this graph

Tengt efni af Loftslag.is:

• Miðaldabrellur
• Hrakningar Lord Monckton – 1. hluti
• Hrakningar Lord Monckton – 2. hluti
• Staðnir að óvönduðum vinnubrögðum

Athugasemdir

[Gunnar Heiðarsson, 13.5.2010 kl. 14:50]

Engu að síður sýna báðar myndirnar greinilega kólnun frá 2006 samhliða auknum styrk CO2

[Marinó (IP-tala skráð) 13.5.2010 kl. 16:59]

Það er ástæða fyrir því að þetta heita hitastigssveiflur - ef þú skoðar neðri myndina þá sjást stutt tímabil þar sem hitastig virðist standa í stað eða sveiflast niður á við - en heildarmyndin sýnir að sveiflan hafi verið upp á við frá 1970.

Það er lítið varið í að skoða bara síðasta spotann og ákveða að það sé nýjasta trendið í þróuninni.

[Finnur Hrafn Jónsson, 13.5.2010 kl. 18:07]

Af hverju fór Tobis ekki enn lengra aftur, t.d. til 1945. Þá hefði hann fengið 30 ára tímabil þar sem öfug fylgni var á milli magns of CO2 og hitastigs.

[Gusti (IP-tala skráð) 13.5.2010 kl. 20:13]

Þið spyrjið hvað sé rangt við þetta graf.

Það sem er rangt við neðra grafið er að kvörðun lóðrétta ássins er eitthvað mjög undarleg. Sviðið nær frá -60 upp í +80.  

Hvaða einingar eru þetta? 

Ennfremur; er þetta frávikfrá einhverju? Hvað táknar "0" á lóðrétta ásnum? Meðalhitastig eða meðal-CO2?   Varla, en eitthvað vantar hér.

Mér finnst eitthvað bogið við þetta,

Er þetta það sem þið eruð að spyrja um?

[Sveinn Atli Gunnarsson, 13.5.2010 kl. 20:56]

Á neðri myndinni er verið að gera endurbætur á efra grafinu, þar sem reynt er að gera grafið án þess að þessar villur sem um er rætt koma fram. Það þarf s.s. að vera samræmi á milli þeirra gagna sem verið er að bera saman, og það er klárlega ekki þannig í fyrra grafinu, samanber punktana þrjá sem nefndir eru í færslunni. Í neðra grafinu er búið að gera lagfæringu, þar sem grundvallarbreytingarnar eru gerðar út frá hinum þremur villum sem eru í fyrra grafinu. Þegar þessi breyting hefur verið gerð, þá sést að samræmi er á milli hitastigs og aukningar CO2 er meiri en fram kemur í fyrra grafinu, sem ýkir aukningu CO2 miðað við hitastigsaukningu fyrir sama tímabil, frávikið á neðra grafinu er útskýrt í textanum sem er í sjálfu grafinu.

PS. Það má líka nefna það að hitastig síðustu 12 mánaða er í hæstu hæðum síðan mælingar hófust, sjá  nánar færslu Emils H. Valgeirssonar: Meðalhiti jarðar í hæstu hæðum