Hitastig og CO2

Í nýjasta Nature er grein þar sem því er haldið fram að bein tengsl séu á milli losunar CO2 og hlýnunar jarðar. Það er viðtal við einn höfunda hér.

Höfundar notuðu loftslagslíkön og loftslagsgögn aftur í tíman til að sýna fram á að það er einfalt línulegt samband milli heildarlosunar CO2 og breytinga í hitastigi jarðar. 

Þeir telja því að nú sé hægt að áætla hversu miklar hitastigsbreytingar verða miðað við magn losunar CO2:

...if you emit that tonne of carbon dioxide, it will lead to 0.0000000000015 degrees of global temperature change.

Þ.e. að við hvert tonn af CO2 sem losað er, muni það leiði til 0,0000000000015 gráðu hækkun í hitastig jarðar.

Þeir segja ennfremur að ef við viljum halda hlýnun jarðar innan við tveggja gráðu markið, þá megi losun ekki verða meiri en 500 milljarðar tonna af kolefni það sem eftir er, eða svipað mikið og losað hefur verið frá upphafi iðnbyltingarinnar.

Þetta er helmingi minni losun en mér sýnist önnur nýleg rannsókn hafi gefið til kynna (sjá Tveggja gráðu markið), en þar var miðað við að 1000 milljarðar tonna væri markið (frá árinu 2000 til ársins 2050). Til samanburðar var losað um 243 milljarðar tonna frá árinu 2000-2006.

Það er því ljóst að mikið þarf að gerast í alþjóðlegu samstarfi ef menn vilja forðast að hitastig jarðar hækki meira en um þessar tvær gráður.

Að lokum er tengill yfir í myndbönd þar sem því er velt upp hvað myndi gerast ef hitastig jarðar hækkar um nokkrar gráður.

Athugasemdir

[Loftslag.is, 11.6.2009 kl. 23:35]

Hér má svo sjá opið bréf frá vísindamönnunum: http://news.concordia.ca/faculties/014942.shtml

[Sveinn Atli Gunnarsson, 12.6.2009 kl. 00:04]

0,3645 gráður hefur mannkynnið samkvæmt þessu hækkað hitann á 7 ára tímabili...að öðrum breytum óbreyttum.

[Loftslag.is, 12.6.2009 kl. 08:05]

Já, ég treysti mér samt ekki til að reikna þetta, því talað er um hvert tonn af CO2 þá hækkar hitastig um 0,0000000000015 gráður - en síðan er talað um milljarða tonna af kolefni (en ekki CO2) - Mér skilst að 1000 milljarða tonna af kolefni sé um 3670 milljarða tonna af CO2. 

Ég þarf aðeins að hugsa þetta betur og lesa mig betur til, til að átta mig á þessu.

Því miður virðist samt sem jörðin eigi inni töluverða hækkun í hita - en það er víst ákveðin tregða í hitastigshækkunum og tengist það að einhverju leiti hafinu. Þessi ræðir þau mál t.d. http://tamino.wordpress.com/2009/05/22/its-going-to-get-worse/#more-1635 

[Sveinn Atli Gunnarsson, 12.6.2009 kl. 09:48]

Ef við erum að tala um 243 milljarða tonna af kolefni, þá er það ca. 892 milljarðar tonna af CO2, eða hvað? Það verður fróðlegt að heyra hvað þú finnur út eftir frekari lestur.

[Loftslag.is, 12.6.2009 kl. 10:26]

Það verður þá ekki fyrr en eftir helgi sem ég kemst í það. Það skal að auki bent á, að ég hef ekki lesið greinina og örugglega fáir (hún var að koma út), það eiga eftir að koma fullt af efasemdum um innihald hennar og útreikningana sem þeir byggðu niðurstöðuna á - grunar mig

[Sveinn Atli Gunnarsson, 12.6.2009 kl. 12:02]

Já ekkert mál var bara að spá í þetta. Það er alveg rétt hjá þér, það þarf að skoða svona niðurstöður vel og athuga alla útreikninga o.s.frv.

Góða helgi

[Páll Jónsson, 12.6.2009 kl. 23:30]

Áhugavert, mjög áhugavert.