Algjört svindl

Enn eru einhverjir sem halda fram rök svipuðum þeim sem koma fram í myndinni the Great Global Warming Swindle, mynd sem var svo sýnd á RÚV á sínum tíma - til óheilla fyrir loftslagsumræðuna hér á landi. Hér er stutt yfirlit yfir það helsta sem vísindamenn sjá athugavert við þessa mynd.

 

Mögulegt = nauðsynlegt.

Best að benda á að nánari umfjöllun um málið má sjá á heimasíðu umhverfisráðuneytisins og hægt er að nálgast skýrsluna sjálfa hér (pdf-skjal 5,3 Mb - rúmlega 200 blaðsíður).

Ég er ekki búinn að lesa skýrsluna, en vil benda á að allar þjóðir heims verða að taka höndum saman um að minnka losun CO2, þar á meðal Íslendingar - og reyndar bendir margt til þess að losun CO2 verði að vera orðin nánast hverfandi árið 2050 til að það takist að halda hlýnuninni fyrir neðan tveggja gráðu markið sem þjóðir heims stefna nú að. Sjá t.d. færsluna Hitastig og CO2 og Tveggja gráðu markið.

Það leiðir hugan að því hvort það sé ekki siðferðisleg skylda okkar, þrátt fyrir smæð þjóðarinnar að við stöndum okkur í stykkinu - því þrátt fyrir smæð þá losum við hlutfallslega mikið, miðað við hina frægu höfðatölu. Ef við, ásamt öðrum minni löndum sýnum að okkur sé virkilega alvara í því að láta þessar loftslagsbreytingar ekki ná einhverjum öfgum, þá er aldrei að vita nema að það náist heimssátt í samdrætti CO2-losunar og að stóru þjóðirnar fari að taka sig almennilega á.

Þegar menn horfa til framtíðar og sjá ekkert nema stórlosanir CO2 til bjargar Íslandi, t.d. álver, olíuhreinsunarstöðvar og jafnvel að reyna sjálfir að nálgast olíu eins og á Drekasvæðinu - þá verður fólk að átta sig á því að þannig áform stefna framtíð Íslands í óefni.

Álver - Ég sé enga framtíð í því, álverð mun hríðfalla næstu áratugina, ekki spurning miðað við þá heimsmynd sem við eigum eftir að upplifa ef ekki verður dregið almennilega úr losun CO2 - fyrir utan að við þurfum á orkunni að halda við önnur verkefni framtíðar. Við erum reyndar í hálfgerðum bobba varðandi álverin, þökk sé stefnu fyrri ríkisstjórna.

Olíuhreinsunarstöðvar og olíuframleiðsla - á næstu áratugum munu þjóðir heims neyðast til að hætta smám saman að nota olíu til brennslu - því er líklegt að það verði offramboð af olíu - olíuverð mun þá væntanlega hríðfalla til framleiðanda (þó það haldist örugglega hátt til neytenda í formi skatta). Það er þó alltaf möguleiki á að eftirspurn verði einhver vegna annarra nota á olíunni, en það kemur í sama stað niður, offramboð.

Áður en maður blaðrar meira um þessa skýrslu þá er líklega rétt að lesa hana, ætli maður prenti hana ekki og taki með sér í sumarfríið - svona ef það skyldi verða rigningatíð

Samdráttur um 52% mögulegur

Hitastig og CO2

Í nýjasta Nature er grein þar sem því er haldið fram að bein tengsl séu á milli losunar CO2 og hlýnunar jarðar. Það er viðtal við einn höfunda hér.

Höfundar notuðu loftslagslíkön og loftslagsgögn aftur í tíman til að sýna fram á að það er einfalt línulegt samband milli heildarlosunar CO2 og breytinga í hitastigi jarðar. 

Þeir telja því að nú sé hægt að áætla hversu miklar hitastigsbreytingar verða miðað við magn losunar CO2:

...if you emit that tonne of carbon dioxide, it will lead to 0.0000000000015 degrees of global temperature change.

Þ.e. að við hvert tonn af CO2 sem losað er, muni það leiði til 0,0000000000015 gráðu hækkun í hitastig jarðar.

Þeir segja ennfremur að ef við viljum halda hlýnun jarðar innan við tveggja gráðu markið, þá megi losun ekki verða meiri en 500 milljarðar tonna af kolefni það sem eftir er, eða svipað mikið og losað hefur verið frá upphafi iðnbyltingarinnar.

Þetta er helmingi minni losun en mér sýnist önnur nýleg rannsókn hafi gefið til kynna (sjá Tveggja gráðu markið), en þar var miðað við að 1000 milljarðar tonna væri markið (frá árinu 2000 til ársins 2050). Til samanburðar var losað um 243 milljarðar tonna frá árinu 2000-2006.

Það er því ljóst að mikið þarf að gerast í alþjóðlegu samstarfi ef menn vilja forðast að hitastig jarðar hækki meira en um þessar tvær gráður.

Að lokum er tengill yfir í myndbönd þar sem því er velt upp hvað myndi gerast ef hitastig jarðar hækkar um nokkrar gráður.

Potholer: Gore vs. Durkin

Ég hafði ekki tekið eftir því að Potholer var kominn með nýtt myndband - en ég hef áður sett inn myndbönd eftir hann. Þetta fer yfir nokkra galla í mynd Gore Inconveniant truth og í mynd Durkin The Great global warming swindle.

Man Made Climate Change in 7 Minutes

Rakst á þetta myndband á YouTube:

Nokkrir tenglar

Ég eyði oft kvöldunum í að skoða ýmis erlend loftslagstengd blogg - en í kvöld þá er ég ekki með aðaltölvuna mína, svo tenglarnir eru fjarverandi - ég man þó alltaf bestu síðurnar en það eru http://www.realclimate.org og http://www.skepticalscience.com/  - báðar eru endalausar uppsprettur fróðleiks um loftslagsmál - þeir blogga ekki oft, en umræðurnar eru einnig fróðlegar.

En tenglalaus þá mundi ég ekki þá tengla sem ég skoða reglulega og fyrir vikið þá rakst ég á nokkur áhugaverð blogg sem ég ætla að skoða annað slagið í framtíðinni.

http://climateprogress.org/ Þetta virðist vera frekar fjölbreytt blogg, þar sem einnig er bloggað um loftslagspólitík og lausnir.

http://tamino.wordpress.com/ Þetta virðist vera áhugavert, en langt á milli færsla, þar er einnig tenglasafn yfir á loftslagsgögn.

http://www.desmogblog.com/ Þetta virðist hressandi aflestrar og fjölbreytt, á eftir að skoða þetta nokkrum sinnum held ég.

El Nino/La Nina - tímabundnar sveiflur í hitastigi.

Mönnum verður oft tíðrætt um El Nino og La Nina í tengslum við loftslag, enda hafa þessi fyrirbæri töluverð áhrif á sveiflur í loftslagi.

Það er til lítils að vera alltaf að tala um El Nino án þess að vita neitt um það, svo ég tók saman það helsta sem ég fann um það á stuttum tíma - vonandi fer ég með rétt mál.

Hvað eru El Nino og La Nina (oft kölluð El Nino Southern Oscillation Index eða Enso)?

Langa svarið er á vísindavefnum, sjá hér, en stutta útgáfan er þessi:

Margra mánaða langt ástand með víðáttumiklum jákvæðum sjávarhitafrávikum í austanverðu Kyrrahafi nefnist El Niño.

Margra mánaða langt ástand með víðáttumiklum neikvæðum sjávarhitafrávikum í austanverðu Kyrrahafi nefnist La Niña.

El Nino og La Nina eru nokkuð sjáanleg fyrirbæri ef skoðuð eru kort af fráviki í sjávarhita Kyrrahafs:

Hitafrávik sjávaryfirborðs (°C) í nóvember 1997, nærri hámarki hins mikla El Niño atburðar 1997-1998. Takið eftir jákvæðu frávikunum við Kaliforníu, en þar slaknar á uppdrætti kaldsjávar þegar vindátt verður vestlægari en venjulegt er (mynd og texti fengin af vísindavefnum).

El Nino myndast á 4-7 ára fresti og stendur í 12-18 mánuði. El NIno og La Nina eru oft plottuð saman á grafi til að sýna ákafa þeirra, svokallaðan Enso Index:

Rauðir toppar eru El Nino og La Nina eru bláu topparnir (mynd af cdc.noaa.gov)

Eins og sést þá er útlit fyrir að nýr El Nino sé að byrja á ný, en nú er talið meira en 50% líkur á að hann fari af stað fljótlega (á næstu mánuðum), en frá byrjun apríl hefur yfirborðshiti við miðbaug Kyrrahafs hækkað í 0,5°C yfir meðallagi (El Nino viðmiðunin er 0,8°C yfir meðaltali). Takið einnig eftir árinu 1998 en þá var El Nino óvenju sterkur og sést það vel á hitatölum frá því ári:

 
Hérna setti ég lauslega saman línuritið fyrir ofan plottað ofan á hitafrávikstölur RSS, takið eftir 1998 - smellið til að sjá stærra.

Þessi frávik í Enso sjást greinilega í hitasveiflum eins og línuritið sýnir hér fyrir ofan, en talið er að hluti af þeirri stöðvun í hlýnuninni sem hefur orðið undanfarin tvö ár sé hægt að rekja að hluta til La Nina (en auk þess er lægð í virkni sólar). Þetta sést greinilega þegar hitagögn eru leiðrétt með tilliti til Enso sveiflna:

Hér má sjá leiðréttingu á hitasveiflum miðað við Enso - þykkar línur og óleiðrétt gögn sem brotalínur. Eins og sést þá er hlýnunin enn í gangi þegar þetta graf var teiknað - ef tímabundnar sveiflur í Enso eru dregnar frá (fengið af RealClimate.org - frá 2008).

Breiðamerkurjökull

Ég vil benda á frétt á heimasíðu veðurstofunnar um Breiðamerkurjökul og lónið framan við hann, en það er nú fullt af jökulís. 

Líklega er um að ræða framhlaup í Breiðamerkurjökli (þó ég ætti nú ekki að fullyrða neitt fyrr en sérfræðingarnir tjá sig um það), en framhlaup jökla er talið verða vegna óstöðugleika í ísflæði, sem veldur því ad mikill ísmassi getur á stuttum tíma (mánuðum) flust frá svæði ofarlega á jökli og að jökuljöðrum.

Á heimasíðu Veðurstofunnar má einnig lesa eftirfarandi:

...framhlaupsjöklar [eru þeir jöklar kallaðir], sem styttast stöðugt um langt árabil en hlaupa svo skyndilega fram án þess að loftslag gefi sérstakt tilefni til.

Þessi hegðun sumra jökla hefur ekki verið skýrð svo fullnægjandi sé, en þó er ljóst að á milli framhlaupa skríða þeir einhverra hluta vegna ekki nógu hratt til að skila niður á leysingarsvæðið þeirri ákomu, sem bætist á jökulinn ofan snælínu. Framhlaupsjöklar verða því smám saman brattari uns þolmörkum brattans er náð.

En eins og kemur fram í fréttinni, þá er ekki vitað hvað er í gangi - hvort það er framhlaup eða eitthvað annað sem er á seyði. Það verður fróðlegt að fylgjast með því.

[Leiðrétti vitlaust nafn á jöklinum]

Earth 2100

Datt í hug að benda á þátt/heimildamynd sem var víst í sjónvarpinu vestanhafs í gærkvöldi á sjónvarpstöðinni ABC. Þetta er þáttur sem hefði verið alveg við mitt hæfi, heimildamynd með vísindaívafi og töluverðu drama og heimsendapælingum. Myndin segir frá Lucy sem fæddist í gær og ævi hennar út öldina - inn í söguna sýnist mér að séu fléttuð viðtöl við sérfræðinga í loftslagsmálum. En því miður hafði ég ekki tækifæri á að sjá þáttinn- kannski getur maður skoðað hann einhvern tíma síðar. En hér er frétt um þáttinn og síðan trailer:

Hægt er að skoða ýmislegt um þáttinn/heimildarmyndina á þessari síðu, meðal annars myndbrot: Smelltu hér

Ég hvet hér með RÚV til að sýna þáttinn.

Ísland ætlar að draga úr losun CO2

Jákvæð yfirlýsing frá Umhverfisráðherra: 

Skýr skilaboð - Ísland ætlar að draga úr losun til 2020

Þar segir meðal annars:

Ríkisstjórnin hefur tvö leiðarljós í loftslagsviðræðunum. Annars vegar að Ísland skipi sér í hóp þeirra ríkja sem vilja ná metnaðarfullu hnattrænu markmiði í loftslagsmálum og leggja sitt af mörkum til að ná því markmiði. Hins vegar á íslenskt efnahagslíf og atvinnustarfsemi að búa við réttlátar og gegnsæjar reglur um losun gróðurhúsalofttegunda, sambærilegar við þær sem gilda á Evrópska efnahagssvæðinu. Án metnaðarfullra markmiða og skuldbindinga munu ríki heims ekki ráða við loftslagsvandann. Án sanngirni og gegnsærra reglna mun ekki nást sátt um hnattrænt átak gegn vanda sem ekkert ríki ræður eitt við.