Hafís | Maí 2010

Við stefnum að því að þessi færsla verði sú fyrsta af nýjum föstum þætti á loftslag.is.  Á fyrstu dögum hvers mánaðar kemur yfirlit á NSIDC varðandi hafísinn á norðurslóðum og munum við birta helstu gröf og myndir sem skipta máli ásamt örlitlum texta.

Hafísútbreiðslan á norðuskautinu minnkaði verulega í maí eftir að hafa verið mikil í apríl. Hitastigið var yfir meðallagi sem hefur væntanlega haft áhrif á útkomuna. Undir lok mánaðarins var útbreiðslan orðin nærri því sem var í maí 2006, sem er það lægsta sem mælst hefur fyrir lok maí mánaðar. Greiningar sérfræðinga frá Háskólanum í Washington reikna með að ísrúmmálið hafi haldið áfram að minnka miðað við síðastliðin ár. Það er hins vegar of snemmt að segja til um það hvort að útbreiðsla hafíssins verði minni í september, en árið 2007, þegar það var minnst frá því mælingar hófust. Það fer mikið eftir aðstæðum í sumar, þ.e. veðurfari og vindi á næstu mánuðum.

Hafísútbreiðsla um mánaðarmótin maí-júní 2010. Miðgildið er merkt með bleikri línu. Hafísútbreiðslan er 500.000 ferkílómetrum undir meðaltalinu 1979-2000.

Þróun hafíss 2010, viðmiðun við meðaltal 1979-2000 og einnig 2006 og 2007.

Samanburður á útbreiðslu hafís í maímánuði, eftir árum. Eins og sjá má er línuleg minnkun í þróun útbreiðslu hafíssins.

Hitafrávik fyrir maí 2010. Hitastigið var víðast 2°-5°C yfir meðaltalinu í mánuðinum.

Frávik í rúmmáli hafíss síðan 1979. Í maímánuði var rúmmálið minnst fyrir mánuðinn síðan mælingar hófust.

Heimildir:

• NSIDC.org - hafísinn maí 2010
• Allar myndirnar eru af heimasíðu NSIDC

Tengt efni á loftslag.is:

• Helstu sönnunargögn
• NASA | Heitasta 12 mánaða tímabilið
• Hitastig árið 2009
• Tag - Hafís
• Ísbirnir við hnignandi hafís
• Er hafís Norðurskautsins að jafna sig?
• Síðbúið vetrarhámark hafíssins á norðurhveli

Athugasemdir

[Ágúst H Bjarnason, 10.6.2010 kl. 20:45]

Segið mér eitt félagar.

  1) Sýna myndirnar hér fyrir neðan ekki það sama?

  2) Hvers vegna er þessi mikli munur á myndunum?

  3) Hvor þeirra gefur réttari mynd af raunveruleikanum?

Gögnin sem neðri myndin er teiknuð eftir eru hér:

ftp://sidads.colorado.edu/DATASETS/NOAA/G02135/

Vissulega eru báðar myndirnar réttar sem slíkar, en... 

Í mínum huga eru myndir sem settar eru fram eins og efri myndin mjög villandi.

Í fljótu bragði gætu menn talið að norðurskautið verði íslaust í maí innan fárra ára, ef menn dæma út frá efri myndinni. Það eru nefnilega ekki allir sem taka eftir því hvernig lóðrétti ásinn er.

Ef við skoðum hallann á ferlinum á neðri myndinni, þá blasir annað við. Norðurskautið stefnir samkvæmt henni í að verða íslaust í maí eftir um 350 ár sýnist mér. Allt önnur mynd blasir hér við.

Auðvitað er ekki rétt að framlengja svona ferla um ókomin ár til að spá fyrir um framtíðina, en það gerir fólk ósjálfrátt. Þess vegna verða menn að gæta sín á því að ferlarnir sýni ótvírætt raunsanna mynd.

 

 

 

[Sveinn Atli Gunnarsson, 11.6.2010 kl. 08:32]

Það má segja að báðar myndirnar sýni það sama Ágúst, í báðum tilfellum er halli niður á við sem sýnir að hafísinn fer minnkandi. Þó hefur efra grafið þann kost að þar er verið að skoða þann hluta gagnanna sem er áhugaverur í þessu tilfelli og það er alvanalegt að setja gögnin svona fram. Hér er t.d. ekki verið að leggja fram spádóma um hvenær hafísinn á Norðurpólnum í maí hverfur, heldur er einmitt verið að sýna leitnina í maí síðastliðin ár (frá 1979). Þetta er sá háttur sem vísindamennirnir hjá NOAA velja til að sýna þessi gögn og ég tel persónulega ekkert athugavert við þessa framsetningu. Það kemur greinilega fram á grafinu hvaða gögn er verið að skoða og á x- og y-ásunum má sjá á hvaða bili gögnin eru.

Ég vona að þetta hafi svarað spurningum þínum Ágúst. Annars er þér velkomið að spyrja nánar út í þetta.