Hvenær fer bráðnun Grænlandsjökuls á fullt?

Bloggfærsla þýdd af Skeptical Science og einnig birt þar

Eitt af því sem vísindamenn hafa áhyggjur af er óstöðugleiki jökulbreiðanna á Grænlandi og á Suðurskautinu. Ef Grænlandsjökull bráðnar að fullu, þá þýðir það allt að 7 m hækkun sjávarstöðu. Að sama skapi þá myndi Vestur Suðurskautið valda um 6 m sjávarstöðuhækkun. Austur Suðurskautið myndi síðan valda um 70 m hækkun sjávarstöðu, en sú jökulbreiða er ólíklegust til að verða fyrir mikilli bráðnun. Því er mikilvægt að rannsaka viðbrögð þessara jökulbreiða við hlýnun jarðar.

Nýlega kom út grein (Stone 2010), en höfundar hennar áætla að styrkur CO2 í andrúmsloftinu, sem yrði til þess að bráðnun Grænlandsjökuls færi á fullt, sé á bilinu 400-560 ppm. Við núverandi losun CO2 út í andrúmsloftið þá verður styrkur þess orðið 400 ppm innan 10 ára.

Þó það sé ákveðin óvissa um eðli jökulbreiðanna, þá eru ýmsar vísbendingar um það hvernig jökulbreiður hegði sér við hlýnun jarðar. Ef við skoðum Grænlandsjökul nánar, hvað segja mælingar okkur þá að sé að gerast á Grænlandi? Þyngdarmælingar frá gervihnöttum sem mæla massajafnvægi hafa sýnt að Grænlandsjökull er að missa massa hraðar og hraðar (Velicogna 2009).

Mynd 1: Breytingar í jökulmassa Grænlandsjökuls áætlað út frá þyngdarmælingum úr gervihnettinum GRACE.Ósíuð gögn eru með bláa krossa og rauðir krossar þegar búið er að sía frá árstíðabundinn breytileika. Besta annars stigs leitnilína er sýnd sem græn lína (Velicogna 2009).

*******

Vinsamlega lesið alla færsluna á Loftslag.is:

• Hvenær fer bráðnun Grænlandsjökuls á fullt?

Súrnun sjávar

Við höfum í nokkrum færslum að undanförnu fjallað um súrnun sjávar. Súrnun sjávar (e. ocean acidification) er aukaafurð losunar á CO2 út í andrúmsloftið og oft kallað ”hitt CO2-vandamálið”. Vegna aukningar CO2 í andrúmsloftinu gleypir sjórinn aukið magn CO2 og við það verða efnaskipti sem breyta pH gildi sjávar og lækkar kalkmettun sjávar. Einnig er talin hætta á því að hlýnun sjávar geti valdið aukningu á því að metan losni úr sjávarsetlögum sem myndi efnasambönd við sjóinn með sömu áhrifum.

Hægt er að lesa nánar um súrnun sjávar á Loftslag.is. Í nokkrum færslum að undanförnu höfum við fjallað nánar um þetta mál. Við höfum m.a. gert það til að minna á fyrirlestur Jóns Ólafssonar haffræðings, sem verður á laugardaginn næstkomandi (20. febrúar). Erindi hans kallast Sjór, súrnun og straumar og er hægt að nálgast frekari upplýsingar um erindið á Loftslag.is.

Ítarefni

• Súrnun sjávar hraðari en fyrir 55 milljónum ára - Umfjöllun um súrnun sjávar og nýja rannsókn sem bendir til þess að súrnun sjávar gerist hraðar nú, en fyrir 55 milljónum árum, þegar mikill útdauði sjávarlífvera varð
• Meiri súrnun – minna járn - Frétt um súrnun sjávar og áhrif þess á járnmagn í sjónum og framleiðslugetu jurtasvifa
• Sjór, súrnun og straumar - Á laugardaginn næstkomandi (20. febrúar) heldur Jón Ólafsson haffræðingur erindið - Sjór, súrnun og straumar
• Súrnun sjávar - Almennt um súrnun sjávar
• Súrnun sjávar – áhrif á lífverur- Nýjar greinar hafa sýnt fram á neikvæð áhrif súrnunar sjávar á lykil lífverur sjávar
• Heimildamynd um súrnun sjávar - 26. september var sýnd heimildamynd á sjónvarpstöðinni Planet Green Network, um súrnun sjávar
• Acid Test – Heimildarmynd um súrnun sjávar - Acid Test – Súrnun sjávar – Áhrif á lífríkið

Afleiðingar

Það er gert ráð fyrir margskonar mögulegum afleiðingum af hækkandi hitastigi. Ekki er hægt að festa niður hvernig þróuninn mun verða í framtíðinni, en flestar spár gera ráð fyrir hækkandi hitastigi á næstu árum og áratugum. Hvernig mögulegar afleiðingar af þeirri hitastigshækkun verða, mun væntanlega verða misjafnt eftir svæðum. Ekki er hér ætlunin að taka afstöðu um það hvort tryggingafélögin hafi reiknað rétt í þessu tilfelli sem fréttin fjallar um.

Á heimasíðunni Loftslag.is höfum við skrifað ýmislegt um afleiðingar loftslagsbreytinga og framtíðina, m.a. eftirfarandi:

• Loftslag framtíðar
• Afleiðingar
• Gagnvirkt kort 4°C hækkun hitastigs
• 2° Markið

Tryggingafélög ýkja loftslagstjón

Súrnun sjávar

Auk hlýnunar jarðar, þá hefur losun CO2 (koldíoxíðs) út í andrúmsloftið önnur og minna þekkt áhrif, svokallaða súrnun sjávar (e. ocean acidification). Frá aldamótunum 1800 hefur sjórinn gleypt einn þriðja af losun manna á CO2 og hefur sjórinn því verið eins konar sía sem minnkað hefur áhrif CO2 á hlýnun jarðar – en um leið hefur það haft áhrif á efnafræði sjávar. Súrnun sjávar (e. ocean acidification) er því einskonar aukaafurð losunar á CO2 út í andrúmsloftið og oft kallað ”hitt CO2-vandamálið”.

Við höfum tekið þetta fyrir á Loftslag.is, meðal annars á eftirfarandi síðum:

• Súrnun sjávar; þar sem við hugleiðum hvað þetta er og hvaða afleiðingar súrnun sjávar geti hugsanlega haft.  
• Súrnun sjávar - áhrif á lífverur - frétt þar sem farið er yfir gögn nýrrar rannsóknar um afleiðingar súrnunar sjávar.

Mikilvægur fundur

Fundurinn í Kaupmannahöfn er mikilvægur þáttur þess að ríki heims komi saman og ræði um losun gróðurhúsalofttegunda og hugsanlegar afleiðingar hennar. Hvað kemur út úr fundinum, mun tíminn leiða í ljós, en það eru mörg atriði sem þarf að skoða nánar og ekki er ljóst hver árangurinn verður. Meðal þess sem þarna verður rætt eru þær framtíðar lausnir og mótvægisaðgerðir sem grípa þarf til. Væntanlega verður losun gróðurhúsalofttegunda rædd með það fyrir augum að draga úr losun. Fundurinn fjallar einnig að miklu leiti um það hvernig aðgerðir verða fjármagnaðar á milli landa, sem er pólítískt mál sem gæti reynst flókið að leysa.

Hægt er að lesa nánar um þetta á Loftslag.is.

• COP15 loftslagsráðstefnan í Kaupmannahöfn
• Lausnir og mótvægisaðgerðir

Danir bjóða 191 þjóðarleiðtoga á fund

Norræni loftslagsdagurinn - Loftslag framtíðar

Norræni loftslagsdagurinn er í dag. Við erum ekki með sérstaka umfjöllun um hann, en við viljum í tilefni dagsins birta hér vangaveltur um loftslag framtíðarinnar.

Framtíðin

Það er margt óljóst um loftslag framtíðarinnar, því það er alltaf erfitt að spá um framtíðina með öllum þeim fjölda breyta sem skoða þarf. Breytingarnar verða líka ólíkar eftir því hvar á jörðinni maður drepur niður, t.d. mun á sumum stöðum verða meiri úrkoma en annarsstaðar meiri þurrkur o.s.frv. Það eru margir þættir sem ráða þarf í og erfitt að spá nákvæmlega um hvað gerist á öllum svæðum. Hækkandi hitastig hefur því margskonar afleiðingar sem nánar er farið í á öðrum síðum þessa vefs. Hér verður fjallað um loftslag framtíðarinnar.

Hitastigshækkun

Lítum fyrst á hversu mikil hitastigs hækkunin er talin geta orðið. Myndin hérundir sýnir nokkrar sviðsmyndir fyrir framtíðina. Í þessum sviðsmyndum er það styrkur koldíoxíðs í framtíðinni sem gefur til kynna hvert hitastigið í framtíðinni getur orðið. Hitastigið er borið saman miðað við ólíkar sviðsmyndir um losun gróðurhúsalofttegunda í framtíðinni. Þarna kemur vel fram að hærri styrkur gróðurhúsalofttegunda er talinn hafa bein áhrif á hitastig. En hvað þýðir það að hitastigið hækki og mun hitastigsbreytingin og þessar loftslagsbreytingar hafa sömu áhrif á öllum svæðum?

Hitastigsbreytingar samkvæmt spám, tekið úr skýrslunni "Hnattrænar loftslagsbreytingar og áhrif þeirra á Íslandi" (smellið á myndina til að fá hana í fullri stærð)

Samkvæmt spálíkönum mun hitastigið við Norðurpólinn stíga meira en meðaltalið. Myndin hérundir sýnir spár um hækkun hitastigs á ákveðnum tímabilum eftir ákveðnum sviðsmyndum. Líkurnar á því hversu stórar hitastigsbreytingarnar geta orðið eru sýndar til vinstri í myndinni. Sviðsmyndirnar eru unnar eftir sömu framtíðarsviðsmyndum og á myndinni hér að ofan.

 

Spá um meðaltalshita

Ferill hitastigshækkunar

Það er algengur miskilningur um þessi fræði, að til að kenningin geti verið rétt, þá þurfi hitastig að hækka álíka á milli svæða og jafnt yfir tímabil. Þ.e. að ekki sé pláss fyrir tímabundnar sveiflur eða að um sé að ræða mun á milli svæða. Í myndinni hér að ofan er gert ráð fyrir ákveðnum mun á milli svæða, þ.e. að áhrifin séu mismunandi eftir því hvaða svæði er skoðað. Næsta mynd sýnir dæmi um hugsanlegan feril hitaaukningar. Eins og sjá má er ferillinn skrikkjóttur, sem er afleiðing margskonar náttúrulegra ferla og breytileika sem hafa áhrif á hitastigssveiflur til lengri tíma. Það er lang líklegast að ýmsir náttúrulegir ferlar muni hafa áhrif á hvernig þessi ferill mun líta út í framtíðinni og þessi mynd er tilraun til að sýna fram á dæmi um það (þetta er ekki spá).  Það er líka hægt að ímynda sér að ef engin hitastigsbreyting væri, þ.e. að línan væri lárétt, þá myndu einnig koma fram sveiflur vegna náttúrulegs breytileika, en í því tilfelli myndu þær sveiflur verða í kringum lárétta línu.

Skrikkjótt hlýnun, dæmi um hitaferil, tekið úr skýrslunni "Hnattrænar loftslagsbreytingar
og áhrif þeirra á Íslandi" (smellið á myndina til að fá hana í fullri stærð)

Úrkoma, þurrkar og veðurfyrirbæri

Spár um úrkomu og þurrka eru einnig mjög breytilegar eftir svæðum. Það er bæði gert ráð fyrir eyðimerkurmyndunum á Spáni og aukinni gróðursæld í Sahara. Af þessu má sjá að það er ekki auðvelt að spá um framtíðina og hækkandi hitastig hefur ólíkar sviðsmyndir eftir því hvar maður er í heiminum og eftir því hvaða sviðsmynd maður skoðar. Á næstu mynd er litið nánar á einstök veðurfarsleg fyrirbæri og líkurnar á því að þau gerist í framtíðinni og hvaða hugsanlegu afleiðingar það gæti haft. Það er talið nánast öruggt að á flestum landsvæðum verði heitara með færri köldum dögum og nóttum, ásamt fleiri heitum dögum og nóttum. Það er talið mjög líklegt að það komi fleiri hitabylgjur en áður á flestum landsvæðum. Fleiri atburðir með stórúrkomu eru taldir mjög líklegir á flestum svæðum. Þetta er hægt að skoða í töflunni hérundir ásamt hugsanlegum afleiðingum á ákveðnum sviðum.

Spár um hugsanlega tíðni veðurfars atburða, tekið úr skýrslu vinnuhóps 2 hjá Milliríkjanefnd Sameinuðu þjóðanna um loftslagsmál (IPCC), bls. 18, klikkið á myndina til að sjá í fullri stærð.

Þegar vísindamenn nota orð eins og nánast öruggt, mjög líklegt og líklegt, þá er verið að tala um líkur á ákveðnum atburðum unnið út frá tölfræði. Á spurningar og svör síðunni má sjá hvað hvert hugtak merkir og tölfræðilegu líkurnar sem liggja á bak við orðin.

Niðurstaða

Helsta niðurstaðan er sú að líklega verður heitara i framtíðinni, með meiri öfgum í veðri. Á sumum svæðum verður meiri úrkoma á öðrum verður meira um þurrka. Hitastigshækkunin er ekki algerlega línuleg heldur munu koma fram náttúrulegar sveiflur eins og hingað til.

Heimildir og frekari upplýsingar:

Skýrsla vinnuhóps 2 Milliríkjanefnd SÞ um loftslagsmál (IPCC)
Skýrslan “Hnattrænar loftslagsbreytingar og áhrif þeirra á Íslandi” Umhverfisráðuneytið 2008
Kenningin

[Þetta er undirsíða af heimasíðunni Loftslag.is]

Er jörðin að hlýna?

Það væri fróðlegt að vita hvaða gögn Umhverfisráðherra Indlands er að vitna til, við skoðum það hugsanlega nánar á næstu dögum. Það virðist ekki vera sem hann efist um að hitastig hafi hækkað á undanförnum árum og áratugum. Við tókum fyrir spurninguna "Er jörðin að hlýna?" á síðunni Loftslag.is á dögunum, sjá færslu hérundir.

---

Það eru þrjár góðar spurningar sem gott er að hafa í huga þegar rætt er um loftslagsbreytingar og þá hnattrænu hlýnun jarðar sem vísindamenn telja að séu af mannavöldum:

• Er jörðin að hlýna?
• Veldur CO2 hlýnuninni?
• Er aukning á CO2 af völdum manna?

Ef hægt er að svara þessum spurningum játandi með sannfærandi vísindalegum hætti, þá hlýtur hver sá sem er vísindalega þenkjandi að komast að sömu niðurstöðu og mikill meirihluti vísindamanna: þ.e. að jörðin sé að hlýna vegna aukningar CO2 í andrúmsloftið af mannavöldum. Í þessari bloggfærslu lítum við á fyrstu spurninguna.

Er jörðin að hlýna?

Það virðist augljóst ef skoðað er línurit með hitastigi frá því fyrir aldamótin 1900 að jörðin er að hlýna:

Hitastig jarðar frá því mælingar hófust (gögn frá GISS).

Undanfarin tvö til þrjú ár hafa heyrst raddir um það að jörðin sé ekki að hlýna, heldur sé hún að kólna (þær raddir hafa nú þagnað að mestu en heyrast þó einstöku sinnum). Þar er á ferðinni óvenjuleg tölfræði sem snýst um það að velja heitasta árið sem kostur er á sem viðmiðun. Oftast er þá notað árið 1998 sem var heitasta árið samkvæmt flestum gögnum og einkenndist af óvenju sterkum El Nino sem magnaði upp hnattrænt hitastig það ár. Síðan er dregin bein línu frá þeim toppi og að stöðunni eins og hún var í fyrra, en þá var hitastig lægra en næstu ár þar á undan, vegna La Nina veðurfyrirbærisins í Kyrrahafinu.

Nokkur hitastigslínurit síðustu 30 ára, ásamt leitnilínum. Auk þess var dregin ein bein lína frá toppnum 1998 og sirka til dagsins í dag (ath: það er ekki leitnilína - trend line).

Það er ýmislegt sem gerir þessa aðferðafræði vitlausa við að meta hvort jörðin er að hlýna hnattrænt. Í fyrsta lagi er beinlínis rangt tölfræðilega séð að draga einfaldlega beina línu frá tveimur punktum línurits til að meta leitni gagnanna á því tímabili en rétt reiknuð leitnilína (e. trend line) sýnir alls ekki leitni eins og teiknuð er hér fyrir ofan. Fyrir ofangreind gögn þá er rétt reiknuð leitnilína nánast flöt ef tekin er tímabilið frá árinu 1998 til dagsins í dag, sem eins og næsti punktur bendir til er vitlaus aðferðafræði.

Í öðru lagi, þá er þetta of stuttur tími til að meta breytingar í loftslagi. Náttúrulegar sveiflur einkenna endapunktana og þær sveiflur eru meiri en sem nemur hlýnun af mannavöldum (sem er tæplega 0,2°C á áratug). Náttúrulegar sveiflur eiga því auðvelt með að yfirgnæfa undirliggjandi hlýnun á svona stuttum tíma. En hlýnunin heldur áfram og fyrr en varir verður vart við uppsveiflu aftur eins og við erum að sjá núna – með vaxandi El Nino. Með því að leiðrétta fyrir náttúrulegum sveiflum í ENSO (El Nino/La Nina), þá fer ekki milli mála að enn er hlýnun í gangi:

Hér eru sýndir hitastigsferlar frá Hadley Center og GISS (brotalínur). Þykku línurnar sýna leiðréttingu fyrir ENSO (frá realclimate.org).

 Það er reyndar spurning hvort nokkur pása sé í hlýnuninni, þótt ekki sé leiðrétt fyrir ENSO. Ef skoðað er hnattrænt hitastig frá GISS stofnuninni (Goddard Institute for Space Studies) þá er ekki hægt að sjá að nokkur pása hafi orðið. Kosturinn við GISS gögnin eru að þau mæla hitastig yfir allan hnöttinn og þar með Norðurskautið, sem undanfarin nokkur ár hefur verið óvenju heitt – fyrir vikið færist metárið yfir á 2005:

Hnattrænt hitastig samkvæmt GISS gögnum frá árinu 1980. Rauða línan sýnir árleg gögn, stóri rauði kassinn sýnir bráðabirgðagögn fyrir árið 2009 út frá hitastigi frá janúar-ágúst. Græna línan sýnir 25 ára leitnilínu (0,19°C á áratug). Bláa línurnar sýna síðustu tvær tíu-ára leitnilínur (0,18°C á áratug fyrir 1998-2007, 0,19°C fyrir 1999-2008).

 Með því að greina tíu ára leitnilínur fyrir öll árin (þ.e. 1990-1999, 1991-2000 o.sv.frv), þá hafa þær allar verið á milli 0,17 og 0,34°C hlýnun á áratug – sem er svipað og búist er við að sé vegna hlýnunar af mannavöldum.

Það er því nánast sama hvernig litið er á þessi gögn ef notaðar eru viðurkenndar aðferðir, að augljóst er að það er að hlýna. En ekki nóg með það - mikill hluti hitans verðum við ekki var við í þessum hitamælingum sem eru gerðar við yfirborð jarðar.

Hafið er að gleypa orku

Hnattræn hlýnun er – hnattræn. Öll jörðin er að gleypa í sig hita vegna orkuójafnvægis. Lofthjúpurinn er að hitna og hafið er að gleypa orku, sem og landið undir fótum okkar. Einnig er ís að taka til sín hita til bráðnunar. ‘Til að skilja heildarmyndina hvað varðar hnattræna hlýnun, þá verðum við að skoða þá varmaorku sem jörðin í heild er að taka til sín.

Skoðað hefur verið orkujafnvægi jarðarinnar frá 1950-2003, þar sem lögð eru saman hitainnihald hafsins, lofthjúpsins, lands og íss. Hafið sem er langstærsti hitageymirinn var mældur í efstu 700 metrunum, að auki var tekið með gögn niður á 3000 metra dýpi. Hitainnihald lofthjúpsins var reiknaður út frá yfirborðsmælingum og hitainnihaldi veðrahvolfsins. Hitainnihald lands og íss (þ.e. orkan sem þarf að bræða ís) var einnig tekið með:

Hitainnihald jarðar frá 1950-2003 (mynd frá Skeptical Science).

Það er nokkuð greinilegt á þessari mynd að hlýnun jarðar hefur verið töluverð frá 1950 til allavega 2003 – samt má sjá nokkuð af náttúrulegum sveiflum. Þessi gögn ná þó ekki lengra en til ársins 2003, en eins og sést á myndinni þá er hafið langstærsti hitageymirinn og því rétt að skoða hvað er búið að vera að gerast í hafinu síðan 2003.

Frá 2003 hafa farið fram hitamælingar með Argos-baujunum, sem er kerfi bauja sem að mæla hitastig sjávar (ásamt seltu og fleira), niður á 2000 metra dýpi. Upphaflega héldu menn að þessar baujur væru að sýna kólnun. Það rekja menn nú til skekkju vegna þrýstings, en þessar baujur sökkva niður á ákveðið dýpi með vissu millibili og fljóta til yfirborðs og mæla gögn í leiðinni – senda þau síðan til gervihnatta sem skrásetja gögnin. Fyrir þessari skekkju er nú leiðrétt og því sýnir úrvinnsla gagnanna greinilega hlýnun.

Hvernig vitum við að sú úrvinnsla, sem sýnir hlýnun, er réttari? Gervihnettir sem mæla þyngdarafl, styðja þetta auk þess sem sjávarstaða hefur hækkað töluvert frá árinu 2003 en stór hluti sjávarstöðuhækkana er vegna varmaþennslu sjávar. Einnig sýna mælingar á inngeislum (til jarðar) og útgeislun (frá jörðinni) ójafnvægi sem ekki verður túlkað öðruvísi en sem hlýnun.  

Eitt af þeim teymum vísindamanna, sem mælt hefur hitainnihald sjávar frá 2003-2008 út frá gögnum Argo-baujanna hafa kortlagt hitadreifingu niður á 2000 metra síðustu ár. Þeir hafa gert eftirfarandi línurit sem sýnir hnattrænan hita sjávar:

Línurit sem sýnir hnattræna hitageymslu sjávar frá árinu 2003-2008.

Samkvæmt þessari mynd þá hefur hafið haldið áfram að safna í sig hita fram til loka ársins 2008. Ef þetta er síðan sett í samhengi við gögnin í næstu mynd þar fyrir ofan þá hefur hlýnunin verið stöðug frá árinu 1970 og fram til síðustu áramót allavega.

Niðurstaða

Aðalpunkturinn sem hafa þarf í huga þegar menn tala um skammtímakólnun í yfirborðshita jarðar, er að þar ráða náttúrulegir ferlar sem geta náð að yfirgnæfa hlýnun jarðar af mannavöldum, yfir svo stuttan tíma. Aðal hlýnunin er samt að mestu falin í hafinu  – en þar hefur hlýnunin haldið áfram óhindruð í næstum 40 ár.

Beinar mælingar sýna því að jörðin er enn að taka til sín hita í auknu magni, hún sankar að sér meiri orku en hún geislar aftur út í geiminn.

Hlýnun jarðar heldur því áfram – því miður.

Næst verður fjallað um spurningu 2: Veldur CO2 hlýnuninni?

Heimildarlisti og ítarefni

Þessi færsla er að miklu leiti unnin upp úr nýlegum færslum frá RealClimate (A warming pause?) og Skeptical Science (How we know global warming is still happening og How we know global warming is happening, Part 2). Þessar síður fara nánar í saumana á þessu og þar er einnig að finna tengla í frekari upplýsingar. Einnig styðst ég töluvert við áður skrifað efni á loftslag.is.

Segir hlýnun ekki ástæðu þess að jöklar hopi

Vendipunktar í loftslagi

Vendipunktar í loftslagi (e climate tipping point) er þegar sú staða kemur upp að loftslagið fer skyndilega úr einu stöðugu ástandi og yfir í annað stöðugt ástand (oft við magnandi svörun). Eftir að farið er yfir vendipunktinn þá er mögulegt að ekki verði aftur snúið.

Menn eru ansi hræddir við slíka vendipunkta og því vilja sumir nú beita loftslagsverkfræði (e. Geoengineering) til að koma í veg fyrir að farið verði yfir þá.

Eftir því sem hlýnar, þá verða breytingar á ýmsum þáttum sem eru stöðugir við hitastigið sem var áður - það er t.d. hugsanlegt að við ákveðið hitastig þá fari bráðnun Grænlandsjökuls af stað og ekki verði aftur snúið – hann myndi bráðna að fullu (það gæti þó tekið töluverðan tíma – jafnvel hundruðir eða þúsundir ára). 

James Hansen einn af helstu vísindamönnum hjá NASA og sá fyrsti sem talaði opinberlega um þá ógn sem hlýnun jarðar stefndi í, heldur því fram að ákveðnum vendipunkti sé náð og að ekki verði aftur snúið – að núverandi magn CO2 sé nóg til að þessum vendipunkti var náð.

“Further global warming of 1 °C defines a critical threshold. Beyond that we will likely see changes that make Earth a different planet than the one we know.” Jim Hansen, director of NASA’s Goddard Institute for Space Studies in New York.

Aðrir vísindamenn telja að um sé að ræða marga vendipunkta sem hafa áhrif á loftslagsbreytingar og að lítið þurfi til að færa nýja ástandið yfir í sama ástand aftur.

Dæmi um mögulega vendipunkta sem gætu fært loftslag yfir í nýtt stöðugt ástand eru t.d. eyðing frumskóga hitabeltisins, bráðnun hafíss og jökla, truflun á hafstraumum og vindakerfum (t.d. El Nino og monsún) og bráðnun sífrera.

[Spurningar og svör - Loftslag.is]

Áhrif loftslagsbreytinga í Afríku

Samkvæmt skýrslu Prófessors Sir Gordon Conway, frá Imperial Háskólanum í London, þá er, þrátt fyrir að margt nýtt hafi komið fram varðandi loftslagsbreytingar á síðustu árum, margt sem við ekki vitum um loftslagsbreytingar í Afríku. Loftslagið í Afríku virðist stjórnast af þremur mikilvægum þáttum: trópískum varmaflutning (e. tropical convection), breytingum í monsúnkerfinu og El Nino í Kyrrahafinu. Fyrstu tveir þættirnir eru staðbundnir þættir sem hafa áhrif á regn og hitastig á svæðinu. Sá síðasti er fjarlægari, en hefur mikil áhrif á úrkomu hvers árs og hitastigsmunstur í Afríku. Þrátt fyrir mikilvægi hvers þáttar, þá skiljum við ekki enn hvernig samspil þeirra er og hvernig þeir hafa áhrif í samspili með loftslagsbreytingum. Eitt ætti að vera ljóst að hraðar breytingar í hnattrænu hitastigi getur haft mikil áhrif á útkomuna, varðandi t.d. hærri sjávarstöðu, hærra hitastig og öðrum m.a. veðurfarslegum þáttum sem geta haft áhrif þar á. En útkoman er ólík eftir svæðum og er það m.a. skoðað nánar í skýrslunni.

[Nánari umfjöllun á Loftslag.is]

ESB til aðstoðar þróunarlöndum gegn loftslagsbreytingum

Sumarbráðnun hafíss á Norðurskautinu

Meiri ís varð eftir við lok sumarbráðnunar en síðustu tvö ár á undan, þrátt fyrir það hefur hafísinn ekki jafnað sig – en þetta ár var lágmarksútbreiðsla sú þriðja minnsta frá því mælingar hófust árið 1979. Síðustu fimm ár eru þau ár sem hafa minnstu útbreiðslu.

Meðalútbreiðsla fyrir septembermánuð var 5,36 miljón ferkílómetrar, sem er 1,06 milljón ferkílómetrum meira en metárið 2007 og 690.000 ferkílómetrum meira en árið 2008. Samt sem áður var útbreiðslan 1,68 milljón ferkílómetrum minni en meðaltal áranna 1979-2000 í september...   

Þetta er hluti fréttar sem tekin er af Loftslag.is, en hægt er að lesa hana nánar með því að smella þennan tengil

Norðurskautsísinn verður horfinn eftir áratug